Kua whakapāohotia te whai wāhitanga o Kahurangi Hinewehi Mohi ki Te Whare Taonga o Aotearoa o Recorded Music NZ i 2024
CREDIT: Jane Ussher
25 tau nō te whakarewatanga o te kōpae waiata tuatahi i whakaputaina e Jaz Coleman, o Oceania. 25 tau nō te ngaringari a te motu Māori i te Kapu Whutupōro o te Ao ki Twickenham. Te whakanuitanga o te 20 tau nō te whakatūnga o Raukatauri Music Therapy Centre. Te whakanuitanga o te 5 tau o Waiata Anthems.
He nui te hunga i whai wāhi atu ai, i ako ai hoki i te reo Māori nā Dame Hinewehi Mohi (Ngāti Kahungunu, Ngāi Tūhoe). Nā te pāpā o Hinewehi i ako ai ia i te reo Māori.
Nā te mea i pakeke ake ia i te reanga i rāhuitia ai te kōrero Māori a ōna mātua i te kura – i patua mehemea i pērā – kāore a Mike Mohi rātou ko ōna kōpūtahi i ākona ki te reo Māori i te taitamarikitanga. E 30 ōna tau ka whakatau ia kia taumanu i tōna matatika tuku iho me te tūhono ki tōna tuakiritanga ā-ahurea. Koinei hoki te wawata mō āna anō tamariki.
E 10 ngā tau o Hinewehi i taua wā, ka rumakina ki te reo mā ngā akoranga o ia rā i te taha o tōna pāpā - he rite tonu tana noho takatū – ā, mā te whakarongo hoki ki ngā kōpae waiata reo Māori, pēnei i a Inia Te Wiata me te Māori Theatre Chorus. I pureingia e ia ki te kāinga o te whānau ki Tamatea i Te Matau a Māui kia waia ai te katoa ki te tangi o te reo.
I ngā tau 1970, he āhuatanga rerekē te ako i te reo Māori. I tāpaetia Te Petihana Reo Māori | the Māori Language Petition ki te Pāremata i 1972, e whakahau ana kia arohia te reo Māori, waihoki kia whakarauoratia i muri i te rautau neke atu. Arā hoki ko ngā hīraunga me ngā pānga o taua kaupapahere. Ko Mike Mohi rātou ko ētahi atu i pāngia e ngā hua o te pāmamae tuku iho ā-reo, i nanao atu ki te wairua o taua takiwā – te whakahau kia huri te tai, kia taumanuhia anō hoki te reo me te ahurea.
Koinei te kākano i puāwai ai a Hinewehi hei aumangea mō te whakamahinga o te reo Māori i ia rā, i ia rā, i Aotearoa, ā, hei kiritohe pokerehū, engari koirā tonu te takune. I ohorere ia i te tautohe i pahū ake i muri i tāna waiata i a 'God Defend New Zealand' i te reo Māori i te Kapu Whutupōro o te Ao ki Twickenham i 1999. Nā te kaiwaiata nei i huri ai te tai. Nā tana tū i puea ake ngā taupatu hou e pā ana ki te whakamahinga o te reo i Aotearoa. I te mutunga iho, nāna i māori noa iho ai te waiatahia o tā tātou ngaringari ā-motu i ngā reo e rua, arā, te reo Māori me te reo Ingarihi.
"Ko tā te puoro, he whakamana. He ara e tūhono ai tātou ki tō tātou reo, ki tō tātou ahurea, ā, ki ētahi atu."
Ka takahi ia i tētahi aramahi whakamīharo rawa atu, ā, ka whakawhiwhia ia ki Te Tohu Kairangi i āna ratonga ki a ngāi Māori, ki te puoro, me te pouaka whakaata, i 2021.
Ahakoa kei te haere tonu te pakanga kia arohia ai, kia whakautehia ai hoki te tangata whenua me te reo Māori, kei te pakari haere anō hoki te taihuringa whakarauora. He poutokomanawa a Kahurangi Hinewehi i te kokenga tonutanga o te kaupapa, e tino pērā ana i te ao puoro.
I tua atu o taua pūrākau rongonui mō Twickenham e 25 tau ki muri, he whānui te whakarerenga a Hinewehi. Nō Kahurangi Hinewehi te tūranga Manukura Puoro Māori ki APRA AMCOS NZ, e taunaki ana i te pikinga o te puoro Māori me te whakawhanaketanga o tētahi ahumahi puoro reorua i Aotearoa.
I mua atu, he mea whakahaere e Kahurangi Hinewehi tōna anō kamupene, arā, ko Raukatauri Productions. He kaiwhakaputa whitiata wheako nui anō hoki ia, e waihanga ana i ngā whitiata neke atu i te 1,000 hāora te roa, hei tautoko i te whakarauoratanga o te reo me te ahurea Māori, e āta aro ana ki ngā waiata reo Māori.
E rima tau ki muri, i tīmatahia e Kahurangi Hinewehi te kaupapa o Waiata Anthems, e tautoko ana i ngā kaiwaiata ki te hopu i ā rātou waiata i te reo Māori.
“I tūpono atu ahau ki a Adam Halt [te pane o Universal Music] ki Vodafone Music Awards o 2018,” tā Mohi, e whakamahuki ana i te ahunga mai o te kaupapa. “Nōku te whakaaro ki te whakamāori i ngā waiata arotini, ā, ka waiatahia e ngā kaiwaiata. Kāore i mutu taku whakaaro ki te puoro, me tana tūhono i a tātou, ahakoa e mahi ana ahau i te ao pouaka whakaata me te whakaputa whitiata matihiko, te hanga hōtaka waiata, me te koke tonu i taua mata i tino kaingākau rā ahau i aku mahi whakaputa.
“I whakatōpūhia e Adam ngā kaiwaiata o Universal, ā, nā Kim Boshier ngā kaiwaiata o Sony. He hōnore te mahi tahi ki a Tā Tīmoti Kāretu i whakamāori nei i ngā waiata, i mua i taku rāwekeweke anō i ngā kupu Māori kia hāngai ai ki ngā rangi. Koia te tīmatanga o tētahi haerenga whakamīharo, te mahi tahi ki ngā kaiwaiata – ko te nuinga kāore anō kia waiata i te reo Māori. Kāore ahau i whakapae i te pānga ki a rātou anō, te tūhonotanga ki tō rātou reo, ki tō rātou ahurea, me ō rātou whakapapa. He taihuringa mō te nuinga, ā, nōku te māri i whai wāhi atu ai ahau.
He mea whakaputa i 2019, i whai wāhi atu ki te kōpae waiata tuatahi a Waiata Anthems te momo pēnei i a Six60, Stan Walker, Bic Runga, TEEKS, Drax Project, me BENEE. I noho ki te tūranga #1 o Official NZ Music Charts, kātahi ka noho atu ki te Top40 mō te 27 wiki. I noho ki te tūranga #1 i te rārangi a NZTop20 Album mō te toru wiki, e 115 wiki ki taua rārangi. Koirā te kōpae-waiata hoko nui tuaono o Aotearoa o 2019, me te kōpae waiata hokonui tuangahuru o Aotearoa o 2020.
“Ko Hinewehi tētahi o ngā tino kaiwhakaawe mātau, ngākaunui anō hoki e mōhio nei ahau. Ko tōna whakakitenga he whakaaweawe, ko tōna ngao ka hōrapa,” tā Holt. “He pānga nui tō te whakaaro māmā, whakaawe hoki o Hinewehi ki te whakatū i a Waiata Anthems, ki te ahumahi puoro o Aotearoa, ā, ki a Aotearoa whānui. Nā te kaupapa rā i āki te taihuringa e aro ana ki te whakatūnga o tētahi ahumahi puoro reorua e angitu ana. Nāna hoki te reo Māori i kawe ki te whakaminenga nui katoa. I roto i tana aramahi, kua whakaatu mai a Hinewehi i ngā āhuatanga e taea ana, ā, kua whakamahara ake i a tātou kia moemoeā tonu, kia pakanga hoki mō ngā mea e tika ana. Nā Hinewehi te huarahi i para hei whai mā tātou.”
He mea nui hoki i te ara reo me te ara puoro o Kahurangi Hinewehi te kuraina ōna ki St Joseph’s Māori Girls’ College ki Ahuriri – i reira whai wāhi atu ai ki te kapa haka – i muri ake hoki ki Te Whare Wānanga o Waikato i ako ai ia i te reo me ngā waiata Māori, i raro i te whakaako kairangi a Tā Tīmoti Kāretu, i te taha o Dr Hirini Melbourne rāua ko Wharehuia Milroy kua ngaro nei.
“I rawe ki ahau te whakangahau. He rawe ki ahau ngā mata o te minenga. He hononga ā-kiko, ā-kare ā-roto anō hoki ki te tangata i a koe e whakangahau ana. He rite tonu tā tō mātou kaiako kapa haka ki St Joseph’s – kua Tumuaki ināianei – a Kahurangi Georgina Kingi, akiaki i te hiranga o te whakaatu i tō mana, me te whakaputa i te ahurea i runga i te whakahīhī me te amaru.”
Ka koke tonu a Mohi ki te whakakanohi i te ahurea Māori i te ao i mua i ngā whakaminenga nui. Heoi anō, ahakoa e waiata ana ki tētahi papa hākinakina, ki tētahi rōpū iti rānei, ko tērā i titia ai te whakangahau ki tōna ngākau ko te āhei o te puoro ki te tūhonohono.
“Ko te āhuatanga hiamo katoa o taku aramahi puoro ko te tūhono atu ki a ngāi Aotearoa me te āwhina i a rātou kia hāneanea ai, kia whakahīhī ai hoki ki te waiata i ngā waiata me te whai wāhi ki tō tātou takenga ā-ahurea rangatira. He rawe ki a au te tuari ki ētahi atu, he motuhenga, ā, ka kitea hoki te mana o te puoro.”
Ka mahara hoki a Mohi ki te wā i noho ai ia hei kaiwhakaputa i te reo irirangi i tana aramahi tōmua i āwhina rā i a ia ki te whakaahua i ōna whakaaro mō te reo me te tuakiritanga. I whakaawe tēnei i āna mahi tito waiata.
“Kāore ahau i kī he kaitito waiata ahau tae noa ki te wā i mahi ai ahau ki Aotearoa Radio. He kaiwhakaputa hōtaka ahau i ngā ahiahipō, nā reira he nui ngā matapakitanga e pā ana ki te wero taumanu i te reo me ngā take tōrangapū. I whāngai rā aua kaupapa i aku titonga waiata. Ka tuhi ahau i ōku whakaaro, kātahi ahau ka tono atu ki a Reverend Hone Kaa ki te whakamāori i aua whakaaro, ā, ka āpitihia e au he rangi, ka hopukina ai. Koirā aku kapohanga tuatahi – i te rīpene maupoto! – i 1992, te tau i whai wāhi tuatahi atu ai ahau ki APRA AMCOS me RIANZ [ko Recorded Music NZ ināianei].
“I te raweke haere ahau i te puoro, engari he mahi runaruna noa iho – koirā tā te nuinga, nā te mea he uaua te whai oranga i te mahi puoro. I mahi tonu ahau i te pouaka whakaata, me te kōrero pūrākau tonu mā te arapāho, i taua wā ko te pouaka whakaata raupapa anake te puna whitiata. Kua huri te tai.
“E maumahara tonu ana a Kahurangi Hinewehi ko ngā tau o te 80 me te 90 ngā tau o te puoro porotēhi, ā, i pihi tahi ake ia i te tāwharautanga o ngā toki pēnei i a Moana Maniapoto me Dalvanius Prime.
“E whakamīharo ana ki tā te puoro titi i te kōrero ki te ngākau,” tana āki. “Nā runga i ngā whakapaunga kaha mā te mātauranga, te arapāho, me te puoro. He nui te tautoko mō te reo, me te hunga hia ako, kia mārama ake ai ki te ahurea, ki te ao Māori me te wāhi ki a rātou.
He tau nui a 2024 mō Kahurangi Hinewehi Mohi. Hei āpiti atu ki te whai wāhitanga ōna ki Te Whare Taonga o Aotearoa, koinei hoki te whakanuitanga o te 20 tau nō te whakatūnga o Raukatauri Music Therapy Centre, me te 25 tau nō te kēmu Kapu Whutupōro o te Ao i 1999 i kōrero nuitia. I whakaputaina hoki tana kōpae waiata tuatahi, a Oceania, i 1999.
Koinei tētahi o ngā kōpae waiata whāroa e toru a Mohi, i hopukina a Oceania ki te reo Māori anake – koinei te kōpae waiata reo Māori hou tuatahi kia whakaputaina ā-ao – he mea whakaputa e te kaiwaiata matua o Killing Joke, e Jaz Coleman, i eke ki te taumata paratinamu puta noa i te ao. He kōpae tēnei i mahi tahi ai a Mohi rāua ko te kaiwaiata ‘rakatū rarikena’, te kaiwhakaputa, te ringa puoro, kaikōtui nei, i āwhina ki te whakatū i a York Street Studios i muri i te hūnukutanga ki Aotearoa. Hau ana hoki tōna rongo i āna mahi ki ētahi atu kaiwaiata o te takiwā, tae ana ki a Shihad me Emma Paki.
“He tangata rongomaiwhiti ia, ka tuku ia i tōna kaingākau ki ngā kaupapa nei,” te kōrero a Kahurangi Hinewehi mō Coleman. “E manawa reka ana mōna i whakapono mai ki a au, me aku whakapono. Nāna i tutungi te hiahia ki te tito, ki te waiata rānei i ngā waiata whai pūtake. Kua mate a ngāi Māori ki te whawhai mō te reo, ā, ki te pupuri i tō tātou ahurea me tō tātou tūnga i Aotearoa, ka rangona tērā i aku titonga.”
He mata haumanu hoki tō Oceania. I whānau mai te tamāhine a Hinewehi, a Hineraukatauri, me te mate roro tuarongo i 1996, anā, ka huri ngā ao o te whānau.
“Nōku ka whānau i taku tamāhine, i mōhio mātou ka pihi ake ētahi wero nui ki a ia, nā Jaz ahau i tohu ki te haumanu waiata, waihoki ki te tito waiata – ko Oceania he whakamahea – kia tino puta ai aku kare ā-roto. Nāna i whakairo ōku whakaaro e pā ana ki te waihanga i āku anō waiata me te whakamahi i tērā hei waka whakaputa i ngā kare ā-roto.”
Nō hea a Kahurangi Hinewehi e apo i ngā mātauranga, ko tētahi wāhanga o tana whakarerenga ko te whakatū i te Raukatauri Music Therapy Centre. I tapaina ki te ingoa o tāna tamāhine, ā, i whakanuia e te Centre tōna Whakanuitanga 20 tau i Maehe. E āwhina ana i te tangata matea motuhake whānui, tae ana ki ngā mate whakawhanake me ngā hauātanga ā-hinengaro, ā-kiko anō hoki.
Ko tētahi o ngā tino maharatanga pea o ētahi ko te karawhiu i te waiata a Mohi rāua ko Coleman, i a ‘Kotahitanga’ ki Jump Jam i te kura tuatahi. I te wā nei, e whai ana a Kahurangi Hinewehi ki te taumanu i te haka nui katoa o te ao (e 4,028 tāngata) i Wīwī, ki tētahi hui ka tū ki Eden Park ā te 29 o Hepetema 2024.
Ka whakanuia a Kahurangi Hinewehi Mohi ki Aoteroa Music Awards ā te Taite 30 o Mei.
Pārongo mātakitaki
Ka whakapāho inamatahia a Aotearoa Music Awards mā AMA Official Media Partner RNZ – ki rnz.co.nz me ngā teihana pāhapori i te 6 i te pō o te 30 o Mei. Ko te hunga kāore e kite i te pāhotanga mataora, ka taea te mātaki te pāho mataora i te Awards ki TVNZ+ mai i te Paraire, te 31 o Mei.
He mea tautoko te pāho mataora me te pāho tononoa nā NZ On Air me Te Māngai Pāho.
Ka whakapāho inamatahia e Official Media Partner RNZ mā rnz.co.nz, ā, puta noa i ana pae pāpāho pāpori.
Mō Te Whare Taonga Puoro o Aotearoa | New Zealand Music Hall of Fame
- He mea whakatū Te Whare Taonga Puoro o Aotearoa i 2007 e APRA AMCOS NZ | Te Tautāwhinga me Recorded Music NZ
- I whakatūngia kia:
- Arohia ngā whāngaitanga a te hunga whai pānga nui ki te kunenga, te whakawhanaketanga me te whakapūmautanga o te puoro i Aotearoa
- Whakatū, kia pupuri, kia whakawhanake hoki i tētahi pae hei whakanui tonu, hei aro tonu ki ngā kaiuru me te puoro nō Aotearoa
- E whai wāhi atu ai ngā kaiwaiata ki Te Whare Taonga, me:
- Whakaputa i tētahi hopukanga, me eke rānei i tētahi tūāoma ngaio nui i roto i te 25 tau neke atu nō te tau whakauru
- Whakatauira mai i te kounga tohe-kore i te puoro
- Nō 2007, kua whakamihia e Te Whare Taonga o Aotearoa te 40 neke atu kaiwaiata, rōpū puoro hou nō Aotearoa
- Ā te Hatarei 18 o Mei, ka whakapuaki a Recorded Music NZ i a Kahurangi Hinewehi hei kaiuru o 2024, ka whakamānawatia rā ki Aotearoa Music Awards ā te Taite 30 o Mei, ki Viaduct Events Centre, Tāmaki Makaurau
- Katoa ngā kaiuru ka whiwhi ‘soundshell’ i Te Whare Taonga o Aotearoa, he taonga i hangaia e te kaiwhakairo rongonui nei, e Jim Wheeler
Mō ētahi kōrero anō e pā ana ki Te Whare Taonga Puoro o Aotearoa | New Zealand Music Hall of Fame, me peka atu ki musichall.co.nz
Mō Aotearoa Music Awards
Ko Aotearoa Music Awards te hui whakaaturanga ā-tau mō te ahumahi puoro, e whakanui ana i ngā kaiwaiata me ngā puoro nō Aotearoa. Ka whakamihi te hui nei i ngā angitutanga ā-puoro nui katoa o te tau, me te whakatū pae mō ngā kaiwaiata hou e pihi ake ana. Tata ki te 60 tau te roa o tana takenga, kua kukune ake te Aotearoa Music Awards kia whakaata i tō tātou tuakiritanga ā-ahurea motuhake. Nāna i rewa ai ētahi aramahi puoro, i whākina ai ngā kōrero o ngā kaiwaiata, me te whakarite tūāpapa mō ngā tino maharatanga.
Ko Recorded Music NZ te kaiwhakaputa i a Aotearoa Music Awards, koia hoki tōna kaitiaki – e tiaki ana i tō tātou takenga ā-puoro, e whakanui ana i ngā tino waiata o mohoa nei me te para i te huarahi mō ngā kaiwaiata o āpōpō.
Ngā Tikanga Whakahaere
E ū ana a Aotearoa Music Awards ki tētahi taiao haumaru, kauawhi anō hoki mō te katoa. Katoa ngā kaiuru, tae ana ki te hunga ka kopoua, me ū ki Ngā Tikanga Whakahaerea AMA.
Tēnā, tukua ngā pātai pāpāho ki a:
Lauren Went, Pead
027 363 0291